هــذي القضـــيه اثــــرت عــــلى نفســــيتي

حبيت اشرح لكم مشكلتي عل و عسى احصل حل او شور يساعدني انني اخذ حقي لانني تعبت من التفكير روحي
لان الموضوع خطير وايد

السالفه انني في يوم كنت استمع لبرنامج بث مباشر شهير و كانوا طارحين موضوع(مختصر الموضوع ان وحده كانت طالبه مساعده من المذيع(بن......) وهو ماعطاها وجه وسكر الخط بويهها مع ان هي بنت البلاد
وبما انها بنت اماراتنا الغاليه انا تعاطفت معاها (لنها حرمه كبيره في السن) قمت طرشت مسج للقناه مضمونه (ان راعوا مشاعر الناس لان هذي مسؤوليه ولمناصب من الله والكرسي مايدوم لحد)

بعدين تفاجأت من ردت فعل المذيع اللي طلب فاصل واتصل يهددني بالفضيحه وسجلت صوته وتفاجأت بنهاية البرنامج انه يذيع رقم تلفوني بصوته اما مليون مشاهد ويقول: (هذا رقم خطابه يديده وعندها بنات بسعر رخيص ومن جميع الجنسيات للزواج و غيره وتعمل بطريقه غير اخلاقيه و قال للشباب ان عندها كل اللي تبونه وغرضها غير شريف وغيرها من العبارات المبطنه اللي تحمل ايحاءات بذيئه تخدش شرفي وتعرض سمعتي و ما خلص كلامه الا والاتصالات تنهال علي مثل المطر وكأن الشباب ماصدقوا يلقولهم صيده و فيه واحد منهم طرش لي موقع عنوان خليع ع تلفوني

تصدقون مسجات خايسه و اتصالات من داخل وخارج البلاد والقهر ان هذ رقمي الوحيد وما عندي غيره وبإسمي وفيه شباب طلعوا الرقم بأسم منو و قاموا ينشرونه و حاولوا يوصلون بيتنا و خليت اخوي يرد عليهم و قالوله (؟إيه انت وين صاحبة الرقم صارت حديث االشارع؟؟؟؟)

قال اخوي دام السالفه تطعن في الشرف يلا جدامي ع الشرطه نفتح بلاغ ضد القناه والمذيع وسرنا فتحنا بلاغ و مشينا في الاجراءات والحمدلله ان شرطة البلاد ساعدونا وحته اذكر مدير مركز شرطة(......) في بوظبي الله يحفظه قال روحي الاماره اللي فيها القناه وبلغي ولاتسكتين الموضوع كبير ولاتخافين

ورحت ووكلت محامي ووصلت النيابه و هني بدت ال..... لان الشخص عنده معارف

ورغم حجم الضرر ورغم اني قدمت كل الادله اللي كانت بصالحي وضده وهي تسجيل بصوت المذيع وتهديده لي وتسجيلات بأصوات الشباب اللي اتصلوا ومسجاتهم وتهديد ثاني بصوت صديق المذيع يهدد بأنني ما بحصل على حقي من هذي القضيه و شريط الحلقه اللي تم التشهير فيها ورغم ان المذيع ارتكب عدة جرايم بحقي وهي :

*جريمة التشهير والتعريض بسمعتي وشرفي وهو مب قصده خطابه قصده(..............)
*جريمة توزيع رقمي
*جريمة خيانة المنصب اللي قاعد عليه عشان ينتقم مني
*جريمة تحريض الشباب على التعرض لي

مع ذلك حكمت المحكمه بتغريم المذيع مبلغ وقدره 500درهم ! الله يسامحهم يعني ماشافوا الادله و الاثباتات؟؟؟

مع ان قانون التشهير في الدوله سجن مده لاتقل عن شهرين ولا تزيد عن سنه أوغرامه لاتقل على 5000ولا تزيد على 10000درهم وين الحق؟؟؟ مب حرام؟؟؟

وفيه ناس وايد قالوا مب معقوله يتعرض لج بسبة مسج واكيد تعرفه وانا اقول اقسم برب العالمين انه تعرض لي بس عشان المسج اللي تعاطفت فيه مع الحرمه العيوز اللي ماسوالها سالفه (حسافه خير تعمل شر تلقى)

انا بعد الحكم الظالم حاولت اوصل( لش......) الله يحفظهم ويديمهم ذخر لنا لانني متأكده ان مايضيع حق من وراه مطالب ومتأكده انهم ما يدرون عن قصتي ولو دروا اكيد مابيرضون للظلم ولا بيسكتون و بيتدخلون في قضيتي لان ألزم ما على البنت سمعتها وانا بنت لا متزوجه ولا شي !

حاليا احاول اوصل لمعالي (وزير ال..........) بقدم تظلم بإسم سموه وبحاول اصل لنشرة علوم الدار او اخبار الامارات و أناشد فيهم (ال........) الكرام التدخل في قضيتي لان الامر بالغ الخطوره و هالمذيع ما اساء لي انا بس انما اساء لصورة الاعلام الاماراتي والقنوات الاماراتيه لان فيه ناس تتابع من خارج الدوله كما انه اساء لنفسه وتورط بقضيه هو ف غنى عنها واساء للدوله اللي عطته الثقه و أولته منصب هو ما يستحقه و غيره أولى بالمنصب هذا ..

قال تــعالى :
(والذين يرمون المحصنات ثم لم يأتوا بأربعة شهداء فأجلدوهم ثمانين جلده و لا تقبلوا لهم شهادة أبدآ اولئك هم الفاسقون) صدق الله العظيم

اذا الله امر بالجلد واذا القانون ينص ع السجن والغرامه ليش ما يطبق ؟؟ انا تعبت نفسيآ كل الناس صدقوا الاشاعه ليش القانون ما انصفني ؟! (انا أملي الأخير بالله ثم بال.......) لان الحكم خلاص صار نهائي واستغرب كيف بيحس بغلطته وهو يدفع 500درهم وبيدفع وهو يضحكـ !
الحكم ضعيف والادله قويه وفي صالحي والمتهم مانال ولو ربع الجزاء اللي امر الله فيه و نص عليه قانون الاحوال الاماراتي

انا صابره أسوة بالسيده عائشه رضي الله عنها اللي صبرت على الظلم لين الله تعالى برأها وبظل أناشد و أناشد و أناشد لين اخذ حقي كامل بإذن الله تعالى

الله لا يراويكم الهم اللي اعيشه والله لايبليكم بمثله

منقول

يسلملي مرورج

راعية النيسان

يسلملي مرورج
MS BorinG

يسلمو على الموضوع

لا حول ولا قوه الا بالله

السالفه فيها جبايل
والله لو انا اخوها جان ارتكبت جريمه فيه
وبعلمه الادب وبفضحه جدام الخلق
وكل هذا شوي عليه
الله يعينها انشالله
لو ضاع حقها من القانون
الله فوق ما بيضيع حقها
وتسلم اخوي ع النقل

مع تحيات
اخوك صعب الوصول